Friday, July 31, 2009

豚組 (素顏天使)

在香港要吃美味而價錢大眾化的日式吉列豬扒，很多人包括我自己在內都會去光顧在尖沙嘴和銅鑼灣均有分店的 Tonkichi 丼吉。但自從試過一次在 Tonkichi 吃到炸得不是熟透的吉列豬柳 (未熟的豬肉！！)；越來越差勁的服務態度，加上無論任何時候門外都有一條長長的人龍，著實已是很久沒有去光顧了。

聽說這家豚組也是日本過江龍，而且質素不錯。看過 Openrice 的食評也一致稱許，就決定選此作為是夜和 K 小姐的飯局地點了。客人也蠻多，越夜人越多，週一夜晚也有約八成滿。

環境方面該是沿用上一手和幸小料理 (已關店) 的裝修吧？燈光比較昏暗，個人來說覺得比 Tonkichi 舒適。本來我們分到是場中的一張小桌，可桌子與桌子之間排太近了。雖然旁邊坐的是兩個日本人上班族，可是還是不太好談話了吧？就調到照片中那些包廂卡座去，寬躺得多。

先來一個小吃炆豚骨，這日式炆豚骨跟咱們的中式炆豚骨大同小異，這店做的比較乾身一點，但調味是不錯的。我則好愛吃這種豬的爽/ 軟骨，平常煲湯要吃湯渣，也專挑這些骨來吃！其實這道小吃炆豚骨最好吃的是那兩塊又軟稔又入味的蘿蔔，切成圓圓的樣子，也很精緻。

分別點了兩個定食一起分享，這是店家很著名的薄脆吉列豬扒定食。主菜之外，漬物自是少不了。當然也少不得是白飯還有椰菜絲沙律，這兩款都是任添的。我就因為這裡的吉列菜式太好吃，竟然吃了兩碗白飯呀！值得一提的是這店附送的麵豉湯超讚，超多材料，以黃麵豉煮過薄豬肉片、紅蘿蔔、豆腐、還有海帶，味道濃濃，加入豬肉之後的麵豉湯更見味美。

至於甚麼是薄脆吉列豬扒呢? 其實是把一塊豬扒以特製的方法，把它壓成長長的薄塊狀，差不多有一張 A4 紙一般的大！吃法也很好玩，用店家給那個切 pizza 用的轆刀，自己切開吃，一個人無可能吃得完呀。至於味道，炸衣很輕身跟大戶屋的可樂餅可比，調味也覺惹味。不過因豬肉壓過扁扁的，就覺得有點乾，但我個人來說則覺得挺有水準的。

蘸的醬汁配以芝麻碎，芝麻先烤過，用後面那兩支木棍稍為擂一下就是，香味四溢。醬汁方面，炸豬扒有專用的豬扒汁；沙律汁則有兩個選擇，分別是普通味道的，另一款則是青芥柚子味道。

另外一個定食則是我非常讚賞的吉列雞肉鵝肝漢堡，鵝肝沒有將貨就價，每一塊漢堡扒都有厚厚一大顆的鵝肝。鵝油香滿瀉，雞肉也不會變乾。當然一個人吃的話的確有點膩，所以我們二人分享就剛剛好了！

服務有禮，不似 Tonkichi 般 pushy 兼硬銷。另外每人點了一杯冰涼的西瓜汁 (特價後 HKD$18@)，買單連加一約 HKD$400，絕對會再光顧！強烈推介！

----------------------

豚組 Butagumi Tonkatsu
地址：銅鑼灣軒尼斯道502號黃金廣場7樓
電話：3428 2862
菜式：日本

Thursday, July 30, 2009

奇味小廚 (素顏天使)

這家奇味小廚據說有個外號叫「鰂魚涌小炒王」，有做潮式食品，鹵水之類的打冷美食；也主打各式廣東小炒，菜式有點像北角東寶一類的大排檔。其實我本人甚喜去這類「麻甩」排檔，可能我「暗啞底」其實是個男人。

才四個人就點了一個中型 size 的潮式拼盤，大堆頭上碟。鹵水鵝(鴨？)太肥，不過鴨粉腸和鴨腎就很對辦，兩者均煮得夠軟稔入味。鹵水味道也很不錯，其他的豬耳、紅腸、豆腐和墨魚就普普通通啦。

黃金吊桶，很出色！鹹蛋黃呈流沙狀，不像很多的店煮到蛋黃結成一塊塊。吊桶炸過，但仍保似嫩滑多汁。當然，少吃多滋味，吃一兩塊過把癮就算了。

(我們跟墨魚有仇嗎？) 這生煎墨魚餅也是好吃得不得了！明顯是手打的墨魚滑，質感略帶粗糙，卻更加彈牙。餅頭餅味最香口惹味，蘸點泰式甜酸醬一起吃，開胃非常。

又是很精采的豉油王炒生腸，生腸是橙色那些麻花狀的生腸，吃不慣的人相信也就不敢吃了。非常爽脆，醬汁香濃惹味，就光這個已可連盡一大碗白飯了。

蔬菜方面，點了這道蒜蓉蒸勝瓜。金銀蒜和粉絲多到完全蓋住了瓜脯，瓜肉鮮甜爽脆。金銀蒜惹味，加上醬油，就這樣簡簡單單已經非常好吃。

同場加影 PY 的新玩具，最近友濟間的話題之物 Olympus EP-1。我拿過上手玩，比我想像中輕身，但機身也較我的 GR-DII 大一點。

我們被分到舊舖那邊，光猛但不算整潔。當然新舖那邊座位較舒適，但這邊則較有排檔風味。服務一般，連飲料和人頭白飯，買單 HKD$380，平到笑，不知道有沒有加一。這裡還有很多新奇的菜式未試，加上真的很好吃的源故，已決定擇日重賽。

----------------------------------

奇味小廚
地址：鰂魚涌英皇道860號地下
電話：2561 8289 (建議訂座)
菜式：港式 / 潮式

Wednesday, July 29, 2009

中民冰室 (不眠王子)

       老字號嘅冰室買少見少！當佢哋就快消失，大家才懂得珍惜 . . . 東頭村重建又重建，剩底最後嘅第 22 座都會喺 2012 年清拆，呢座樓已經有 44 年歷史，咁你應該估到呢度啲舖頭間間都一把年紀啦！呢度最有趣、最值得嚟影吓嘅必定係理髮店，圍住 22 座行一個圈，你唔會相信呢度理髮店嘅數量相等於幾個屋村嘅總和 . . .
      呢度嘅老字號冰室有 2 間，中民冰室 係其中之一，已經有四十幾年歷史。自己係一個真心愛舊式冰室嘅人，唔會為咗冰室而冰室，飲杯嘢、影吓相、拍吓 pat pat 走人就當係嚟過。如果一直有睇開王子個 blog ，都知我每次講老字號，一定會食吓、寫吓人哋累積幾十年經驗嘅招牌美食，咁至真正算緬懷吓嘛！

可能時日無多，冰室再破舊，老闆明顯無再修復嘅打算，早兩年仲可以入去坐吓卡位，早兩日再去，得番幾張門口對出嘅枱可以坐，咁咪好熱？唔怕，老闆夠細心，放咗幾把座地大風扇吹呀吹！

雖然破破舊舊、雖然 3 號風球，但嚟幫襯嘅街坊都有唔少，比附近另一間冰室錦華旺場得多。

       上咗年紀嘅伯伯呷啖熱咖啡、嘆吓三文治，不忘分少少手上嘅包包，招呼吓一班日日喺度搵食嘅老友記 . . .
      呢啲咁寫意悠閒嘅生活，喺新式屋邨搵唔到架啦！

鮮牛肉奄列 賣 $15 份唔出奇，但 size 差唔多有兩個手掌咁大嘅就真係極少見，好彩未食 lunch ，唔係點消化呀？

奄列唔知用咗幾多隻蛋去煎呢？大大塊就咁睇好似無乜特別，用刀喺最厚嘅部份切開至見真章。

鮮牛肉無花假，真係好鮮味，無用啲乜粉物粉醃過

牛肉嘅份量相當多，唔會話熟到過龍，咬落亦唔韌

睇吓蛋裡面嗰層原來咁鬆軟滑溜，仲有好多蛋汁添！

叉燒炒意粉 咁花功夫，而家好少冰室肯做啦！做湯意粉又快又容易嘛！咁大碟都係賣 $15？睇啲叉燒嘅份量都要 $6-$8 成本啦！仲要唔係俾啲隔夜乾硬化叉燒你喎！

炒意粉好考功夫架！動作要快之餘味道又要均勻，時間又要掌握得好，一唔專心啲意粉就會好易濃，炒太耐又會變得太乾身影響口感，你話幾煩呢！

呢碟意粉色澤均勻有鑊氣，食落又唔油膩，So Good！

凍奶茶 唔記得嗌少甜，味道甜咗啲咁啦！但 $9 杯咋！

       凍咖啡 嘅水準明顯高過奶茶好多，咖啡味相當香濃，正過好多茶記，又係賣 $9 杯，咁抵飲，去邊度搵？
      呢間冰室確係好抵食，雖然黃昏 6 點就收工，但我都會多啲嚟捧場！

電話 : 2382 1644 平均消費 : $15 - $25 / 位
地址 : 九龍城黃大仙東頭村 22 座 10-11 號舖

Tuesday, July 28, 2009

隱世超正豆腐花 (不眠王子)

       點至算一碗超正嘅熱豆腐花呢？對我嚟講 . . . .
      首先要夠熱啦 . . . 咁係呀嘛！一係熱、一係凍先叫正
      仲要夠滑，唔好以為喺市面所有豆腐花都係滑嘅！
      要有豆香，呢樣越嚟越少豆品店做得到，當然，部份原因亦跟某啲舖頭嘅糖水甜到蓋過咗豆味有關。
      糖水甜度適中之餘要帶有薑味，出面好多賣豆腐花嘅都無落薑啦！冬天凍冰冰食熱豆腐花，無薑點驅寒？
      最後一樣純係個人口味，豆腐花最好用木桶裝住嚟賣。阿麗梅話齋 : 木有木味、膠有膠味 . . . 好似飲可口可樂咁，玻璃樽始終正過膠樽，豆腐花就木桶正過用膠桶。
      亞順芽菜豆腐 唔單只乎合晒我以上要求，仲額外送多咗樣嘢！有乜送？就係老闆四萬咁嘅笑容 . . . 免費嘅！

亞順芽菜豆腐 喺長沙灣保安道街市地庫，由正門搭扶手電梯落底層，個檔口就喺正電梯旁邊。呢檔嘢前面賣菜，側邊就賣各種豆品，真係隨時走寶架！

未食豆腐花之前，飲杯 $4.5 嘅凍豆漿先

凍豆漿 超滑溜，唔會過甜，天然豆香就更出。唔似得市面啲豆品連鎖店咁一係淡到似飲豆渣水，一係就甜到死遮晒啲豆味。最正係呢度嘅豆漿飲完唔會覺得渴喉。

豆漿仲有細樽 ( $9 )及大樽裝 ($14) 俾你外賣攞走添！

豆腐花只有熱食，每日新鮮製作一桶の限定，下午 3 點開賣，賣完即止。想食超正豆腐花唔該準時到。

王子接近 4 點嚟到，你睇個木桶 . . . 差啲食唔到呀！

熱豆腐花 係咪睇相都感覺到好滑溜呢？滑嘟嘟到唔知點形容好，豆香濃到未入口都索到，糖水甜度適中兼有陣幾濃嘅薑味，豆腐花滑到咁，食嗰陣真係要小心一嘢跣咗入喉嚨燙親呀！

黃糖雖然唔係嚟自德成，但睇住佢溶入 "花" 中，跟糖水一樣都係同 "香" 喎 . . . . 食得太亨奮，痴咗線添！

       話明豆腐花嘛！唔好咁懶就咁食，剁碎到好似上面呢碗咁至有豆腐花 feel 嘛！咁正嘅熱豆腐花賣 $7 碗咋！
      記住呀！唔好太遲去呀！

時限 : 3p.m 起‧賣完即止 平均消費 : $4.5 - $11.5 / 位
地址 : 長沙灣保安道市政大廈地庫 136 號舖

Monday, July 27, 2009

火腿 (唯靈)

懷舊煮意

火腿

2009年07月24日

火腿曾經是名貴的食材，「雲腿」在粵菜的地位十分崇高，時至今日，儘管已經有名無實，菜譜上仍多「雲腿菜」。中國火腿兩大流派：（一）雲南宣威（二）浙江金華。雲南火腿帶肥多，金華火腿較精瘦。粵菜上湯以老雞、火腿、豬肉為原料，肥肉多的雲腿不及較瘦的金華火腿適用。故近幾十年香港市面只有金華火腿（或其他浙江火腿冒充者）而無雲南火腿，有之者只得罐頭雲腿而已。

在六十年代當雲吞麵仍只售五毫一碗之時，中環燒臘店的「茶腿」已賣五元一両，七八十年代之交，原隻金華火腿也須六七十元一斤，火腿平過生豬肉的怪現象簡直匪夷所思。
中國火腿雖偏鹹但卻是提鮮增味的妙品，以些須作配，不論魚、肉、瓜菜都頓然脫胎換骨，尋常之物也飛上枝頭變鳳凰了。
夏季熱門時菜歷百年不衰的「科甲冬瓜」實則是「火腿夾冬瓜」，把一片火腿夾在冬瓜之中加上湯蒸透，原汁勾芡晶瑩如玉，白裏透紅的漂亮賣相、葷素結合、清鮮可喜的口味十分怡情。
把「火腿夾冬瓜」稱為「科甲冬瓜」是封建時代未廢科舉之時的產物，朝廷開科取士，讀書人以「登甲第」為升官發財的階梯。好舞文弄墨的酒樓掌櫃「老師」便把「火夾」雅稱為「科甲」了。
《美味求真》食譜有「冬瓜腿」和「肇菜腿」，都是以火腿與瓜菜相配的夏令與冬天的「時菜」，往昔蔬菜受季節性制約不像而今四季長備。
「肇菜」，今多寫作「紹菜」或「津菜」，即「黃芽白」、「大白菜」，往昔要到天冷才上市，非如今日四季常見。
這「肇菜腿」今上海館與粵菜都叫作「火腿津白」，古老當時興，頗受歡迎。
《美味求真》古譜載：「冬瓜腿」火腿出清水切片冬瓜切雙飛片一片冬瓜兼火腿一塊砌於缽上紹酒二両隔水燉至煁上碟此夏天菜也。
「肇菜腿」用好多水肇菜弄法照冬瓜腿便合此冬天菜也味勝前菜。
不論「冬瓜腿」或「肇菜腿」烹飪都很簡單，但須注意火腿要預先加工，原隻生火腿浸洗、煮烚十分麻煩而且更難切割，非家庭烹飪所宜。要吃火腿只合去南貨鋪買切割開的金華火腿，或去燒臘店買「熟茶腿」。
南貨店的火腿件可用淡鹽水浸過夜，拔除部分鹹味，然後加紹酒、糖和清水（以經浸過火腿為度）蒸兩小時，攤涼後用保鮮紙包裹放在雪櫃隨時取用。
燒臘店的熟茶腿可以免掉上述加工程序的麻煩。

科甲冬瓜（火腿冬瓜夾）

放大圖片

材料：火腿片（ 1"× 2"）十二件、冬瓜件比火腿片略大少許，厚 1/3"當中橫剖一刀兩片相連不斷成十二件冬瓜夾。

製法：火腿片瓤入冬瓜夾中，鋪砌在大碗中，灑下紹酒一湯匙，用保鮮紙封口，蒸一小時。
取火腿冬瓜夾鋪砌碟上，原汁落鑊加滾油一湯匙，削片糖一茶匙，紹酒半湯匙，濕生粉勾芡澆蓋在面。

放大圖片

金腿娃娃（金華火腿娃娃菜）

材料：火腿片（ 1"× 2"）十二片、娃娃菜十二両、生薑六片。
製法：娃娃菜切手指大小長條。起油鑊下薑片爆透娃娃菜，注清水僅浸過菜面，稍為扒開放下火腿片，上蓋中小火煮二十分鐘至菜軟，灑下紹酒一湯匙，濕生粉勾芡上碟。

Sunday, July 26, 2009

食肆短評 - 49

龍景軒：某些人某些選擇，鬼佬鍾意黑咕肋掘加扁鼻，米芝蓮三星亦如是。

異國情：眼見咁多一面倒嘅『好』評，立刻相約 E 小姐週未去會一會佢。為了保證能獲得到最大『貼錢買難受』的滿足，事前做了許多情報搜集，希望一嚐 .......
- 唔熱湯
- 極薄刀功脆脆蒜蓉包
- 一小塊鵝肝
- 硬豬扒
- 無問幾成熟牛排
- 熱O水：想睇下點『比較穩陣』
- 一副面容呆滯、發出"哦"一聲的侍應
點知道原來執笠了，一切計劃成泡影！好對手當真難求，轉瞬即逝！

LaVilla 38 ：普普通通，一般溝女之選。

小杬公菜館：D 餸夠熱，味道不錯，值得再去。

Ritz Carlton (Singapore)：海南雞飯味太淡、雞欠味、飯太鬆，60 分而已。