大廳樓底極高,空間感十足,坐得舒服!
真係食景都夠呀!!
高到上頂嘅酒櫃裝飾都幾特別,仲有好多中國酒,夠愛國呀!! 唔係淨係紅,白酒靚架,祖國黃,白酒都唔差架!
菜單一早準備好,謝謝好友安排!
每位有XO醬一碟,全乾瑤柱絲及蝦米,辣度微弱,其實我地齋食都覺得好好味!
前菜 冰糖蘿蔔 - 唔會炆得過腍嘅蘿蔔,有蘿蔔味得黎夠清甜,正!
蜜燒西班牙黑豚肉叉燒 / 蟹肉蓮藕餅 / 桂花蜜椒蟮球
蜜燒西班牙黑豚肉叉燒 - 原來用西班牙黑豚肉真係好有豬味,肉質亦十分腍滑!! 今次第一次食真係愛上左. 下次都一定要番黎食呀!!!
蟹肉蓮藕餅 - 蟹肉十分鮮味,蓮藕爽口!! 好配搭!
桂花蜜椒蟮球 - 外脆內滑,有花椒味,多重口感,美味呀!!!
原個椰皇花膠燉雞 - 本身燉雞都已經好甜,再加埋椰青水就更加甜!! 下次自己都可以試試喎!!
碧玉簪蝦球 - 超爽甜蝦球配同樣爽脆菜芯都唔錯喎. 平時多數用露筍,但原來用菜芯又另一種感覺,有趣!
翡翠黃金蝦仁 - 話就話蝦仁,但其實體積一啲都唔細. 黃金醬平均包裹整隻蝦,做得乾身唔油膩亦冇過鹹. 仲食到蝦嘅鮮甜味,真係做得好好呀!
龍軒東坡肉 - 肥膏部份溶化入口,瘦肉部份亦同樣腍滑,超正!! 其實最正反而係個汁,唔過濃,唔過甜,味道平衡得十分好! 大家都立即諗起食友瀨野王,佢一定要碗白飯撈黎食!! 不過我地就知道仲有野食,一定要留肚!
黑豚肉煎鵝肝卷 - 全晚高潮所在. 黑豚肉包住鵝肝及洋蔥,又香又軟配上洋蔥爽甜,簡直係絕配!! 各人都讚不絕口!!
白王綿綉上素盒 - 係時候要清一清來個素菜. 蘿蔔又腍又甜,加上粒粒冬菇及菜甫好食!! 旁邊兩個用小唐菜做嘅花花真係靚到唔捨得食!!
鮑粒荷葉飯 - 最後每位上既荷葉飯. 荷葉香氣撲鼻,飯粒分明又飽滿,材料豐富,好飽都食到一粒飯都冇嘥呀!!!
黑松露奶凍 - 本來只係簡單嘅奶凍,加上幾片黑松露完全令佢有生氣!! 黑松露濃郁配清淡奶凍好夾!! 而且唔太甜,我都食哂呀!!
離開去的士站見到香港夜景真係好靚呀!!!
| 地址 : | 尖沙咀柯士甸道西1號環球貿易廣場香港麗思卡爾頓酒店102樓 |
No comments:
Post a Comment