大叢海鮮火鍋

今次要又介紹大叢喇! 本來由客人進展成朋友,原因都係大家鍾意講飲講食,佢地又好友善,好客,所以成日都不自覺又去左幫襯喇!! 當然食物水準有番咁上下先會成日去啦!! 佢地近來換左兩個新廚,一個跟過阿一,一個係頂好過黎,都好得架!!

焗魚腸

都唔少魚腸架! 同埋佢唔係一般大排檔做法成個砵去炸,炸到好油. 呢個真係焗,面頭微微焦香,又唔會油. 不過我叫佢下次可以試下蒸,因為蒸,蛋就更加滑,仲好食呀!!

蝦膠釀尖椒 - 佢整少少出黎俾我做送酒小食. d尖椒條條都辣架!!! 正呀!!!

雙冬炒鴿甫 - 由一隻頂鴿起肉,肉就炒,骨就炸,一鴿兩食,真係唔錯. 而且鴿肉好有鴿味,完全唔似陸羽梳打味勁到食唔出係咩肉!! 呢個真係有水準!!!

仲有好多新菜式即將上餐牌. 尋晚撞到個睇我blog既食友上去,叫左佢既蜜汁脆薑雞,又脆又甜,送酒唔錯,好食呀!!

仲有好多都好想試,一之過試唔哂呢!!! 要分好多次黎,又或者要拉大隊食齊佢喇!!! 搵我訂檯仲有九折架!! 嘻嘻!!

地址 :

尖沙咀山林道4-4A號恒貿商業中心1樓

電話 : 2730 1828